8:41 AM | Posted by samakomlao

ນັກທຸລະກິດເຊື້ອສາຍຈີນສົນໃຈຈະລົງທຶນໃນລາວ

(ຂປລ) ນັກທຸລະກິດເຊື້ອສາຍຈີນຈາກ ລາວ-ຫວຽດນາມ ແລະ ກຳປູເຈຍ ທີ່ດຳລົງຊີວິດໃນຕ່າງປະເທດ ສະແດງຄວາມສົນໃຈຢາກມາລົງທຶນໃນຂະແໜງ ການຕ່າງໆ ໃນ ສປປລາວ ໂດຍສະເພາະ ຂະແຫນງການ ທ່ອງທ່ຽວ, ການຄ້າ, ກະສິກຳ, ອຸດສາຫະກຳເບົາ ແລະ ພະລັງງານ ພາຍຫລັງໄດ້ມີການພົບປະຫາລື ແລະ ແລກປ່ຽນຄວາມຄິດເຫັນ ໂດຍຜ່ານເວທີກອງປະຊຸມພົບປະສັງສັນສຳພັນຄົນເຊື້ອສາຍຈີນ ຈາກ ລາວ-ຫວຽດນາມ-ກຳປູເຈຍ ຄັ້ງທີ V ທີ່ໄດ້ໄຂຂຶ້ນຢ່າງ ເປັນທາງການໃນວັນທີ 9 ພະຈິກ 2011 ນະຄອນຫລວງວຽງຈັນ.

ກອງປະຊຸມພົບປະສັງສັນຄັ້ງນີ້, ໂດຍການເປັນກຽດເຂົ້າຮ່ວມຂອງ ທ່ານ ດຣ ທອງລຸນ ສີສຸລິດ, ຮອງນາຍົກລັດຖະມົນຕີ ແລະ ລັດຖະມົນຕີວ່າການກະຊວງ ການຕ່າງປະເທດ ແຫ່ງ ສປປ ລາວ, ທ່ານ ນາງ ປູ ຈຽນ ກົວ, ເອກອັກຄະລັດຖະທູດວິສາມັນຜູ້ມີອຳນາດເຕັມແຫ່ງ ສປ ຈີນ ປະຈຳລາວ ພ້ອມດ້ວຍຊາວເຊື້ອ ສາຍຈີນທີ່ດຳລົງຊີວິດຢູ່ພາຍໃນ ແລະ ຕ່າງປະເທດປະມານ 2.000 ຄົນຈາກ 17 ປະເທດທົ່ວໂລກເຂົ້າຮ່ວມງານດັ່ງກ່າວ.

ກອງປະຊຸມຄັ້ງນີ້, ທ່ານ ດຣ ທອງລຸນ ສີສຸລິດ, ໄດ້ກ່າວສະແດງຄວາມຕ້ອນຮັບອັນອົບອຸ່ນຕໍ່ບັນດາທ່ານຕາງໜ້າໃຫ້ແກ່ ຊາວເຊື້ອສາຍຈີນ ທັງພາຍໃນ ແລະ ດຳລົງຊີວິດໃນຕ່າງປະເທດ ທີ່ໄດ້ເດີນທາງມາຮ່ວມກອງປະຊຸມພົບປະສັງສັນໃນຄັ້ງນີ້,

ເຊິ່ງເປັນກອງປະຊຸມແຫ່ງຄວາມສາມັກຄີຂອງວົງຄະນາຍາດຊາວຈີນທີ່ເຄີຍດຳລົງຊີວິດໃນລາວ, ຫວຽດນາມ ແລະ ກຳປູເຈຍ, ທັງເປັນໂອກາດອັນດີໃຫ້ແກ່ ຊາວ ຈີນທີ່ມາຈາກທົ່ວໂລກ ແລະ ເຄີຍດຳລົງຊີວິດ ແລະ ເຮັດວຽກຢູ່ບັນດາປະເທດຕ່າງໆນັ້ນ ໄດ້ກັບຄືນມາຢ້ຽມຢາມບ້ານເກີດເມືອງນອນຂອງຕົນ ແລະ ຈະສາ ມາດໄດ້ເຫັນປະເທດຊາດຂອງຕົນ ທີ່ໄດ້ຮັບການພັດທະນາ ແລະ ເປັນການເປີດໂອກາດໃຫ້ບັນດາທ່ານໄດ້ປຶກສາຫາລືຊອກວິທີຮ່ວມກັນປະກອບສ່ວນ ເຂົ້າໃນການສ້າງສາພັດທະນາ ຊຶ່ງເປັນບ້ານເກີດເມືອງນອນ ຫລື ບ່ອນທີ່ເຄີຍລຳລົງຊີວິດຂອງບັນພະບູລຸດ ຂອງບັນດາທ່ານໃຫ້ນັບມື້ນັບຈະເລີນ ວັດທະນາ.

ທ່ານ ຮອງນາຍົກ ຍັງກ່າວສະແດງຄວາມຊົມເຊີຍມາຍັງພີ່ນ້ອງຊາວຈີນ ທັງຫລາຍທີ່ພ້ອມພຽງກັນຈັດກອງປະຊຸມ ຄັ້ງນີ້ດ້ວຍຄວາມສາມັກຄີເປັນຈິດໜຶ່ງໃຈດຽວ ກັນ ຊຶ່ງສາມາດເຕົ້າໂຮມເອົາຊາວເຊື້ອສາຍຈີນທີ່ເຄີຍດຳລົງຊີວິດຢູ່ ລາວ, ຫວຽດນາມ ແລະ ກຳປູເຈຍໃນທົ່ວໂລກມາພົບປະສັງສັນ ແລະ ປຶກສາຫາລືເພື່ອຫາ ວິທີ ແລະ ເງື່ອນໄຂໃນການປະກອບ ສ່ວນສ້າງສາພັດທະນາເສດຖະກິດ-ສັງຄົມໃນ 3 ປະເທດດັ່ງກ່າວໃຫ້ຈະເລີນຮຸ່ງເຮືອງຂຶ້ນໄປເລື້ອຍໆ. ໄລຍະຜ່ານມາ, ໃນ ສປປ ລາວມີພີ່ນ້ອງຊາວຈີນຕ່າງດ້າວ ໄດ້ມີການປະກອບສ່ວນອັນສຳຄັນ ເຂົ້າໃນການປົກປັກຮັກສາ ປະເທດລາວເຮົາຄືກັນກັບບ້ານເກີດເມືອງນອນຂອງຕົນ ແລະ ທັງໃຫ້ການສະໜັບສະໜູນລັດຖະບານລາວໃນການພັດທະນາເສດຖະກິດ, ການສຶກສາ, ການລົງທຶນ, ສ້າງໂຮງຈັກ-ໂຮງງານ, ຮ້ານຄ້າ-ຂາຍ ແລະ ອື່ນໆ ທົ່ວປະເທດ.

ທ່ານ ທອມ ກີມຊັນ, ນັກທຸລະກິດເຊື້ອສາຍຈີນທີ່ດຳລົງຊີວິດໃນລາວໄດ້ເປີດເຜີຍວ່າ: ພວກເຮົາມາພົບສັງສັນ ແລະ ປຶກສາຫາລືກັນໃນຄັ້ງນີ້ ໄດ້ມີຫລາຍບັນ ຫາທີ່ສ້າງຄວາມສົນໃຈໃຫ້ພວກເຮົາ ໄດ້ຮຽນຮູ້ ແລະ ທັງເປັນການສ້າງໂອກາດໃຫ້ການລົງທຶນໃນລາວໂດຍສະເພາະການຄ້າ, ອຸດສາຫະກຳເບົາ, ທ່ອງທ່ຽວ, ກະສິກຳ ແລະ ອື່ນໆ. ສະເພາະຄວາມສົນໃຈຂອງ ທ່ານ ທອມນັ້ນແມ່ນຢາກລົງທຶນ ສະໜອງອຸປະກອນທີ່ຈຳເປັນ ສຳລັບຜະລິດພືດກະສິກຳໃນລາວ.