ລັດຈະເປີດກວ້າງໃຫ້ສັງຄົມ ແລະ ສື່ມວນຊົນຮ່ວມຕ້ານການສໍ້ໂກງ !
ລັດຖະບານເຊື່ອສັງຄົມ ແລະ ສື່ມວນຊົນຈະເປັນກະບອກສຽງສຳຄັນທີ່ຊ່ວຍເປັນຫູເປັນຕາແກ່ອົງການຈັດຕັ້ງລັດເກັບລາຍຮັບໃຫ້ບັນລຸແຜນ, ຫລີກເວັ້ນການຕົກເຮ່ຍເສຍຫາຍ ໂດຍລັດຈະປົກປ້ອງຜູ້ໃຫ້ເບາະແສຢ່າງເປັນທຳ.
ທ່ານ ທອງສິງ ທໍາມະວົງ ນາຍົກລັດຖະມົນຕີ ກ່າວເມື່ອບໍ່ດົນມານີ້ວ່າ: ການແກ້ໄຂບັນຫາການຂາດດຸນງົບປະມານ ແລະ ຫນີ້ສິນພາຍໃນທາງອອກທີ່ສໍາຄັນແມ່ນລວມສູນຢູ່ໃນການຂຸດຄົ້ນລາຍຮັບເຂົ້າງົບປະມານໃຫ້ໄດ້ຕາມແຜນ ແລະ ລື່ນແຜນທີ່ກໍານົດໄວ້ ເຊິ່ງທັງຫມົດນີ້ຜູ້ທີ່ເປັນຫົວຈັກຫລັກແຫລ່ງແນ່ນອນຕ້ອງແມ່ນຂະແຫນງການກ່ຽວຂ້ອງຂອງລັດ ແລະ ບັນດາຫົວຫນ່ວຍທຸລະກິດໃນທົ່ວສັງຄົມພ້ອມໃຈກັນຈັດຕັ້ງປະຕິບັດ.
ເພື່ອເພີ່ມທະວີຄວາມຮັບຜິດຊອບໃນການເກັບລາຍຮັບພາຍໃນໃຫ້ໄດ້ຕາມແຜນໃນສົກນີ້ທົ່ວປະເທດເຮົາຕ້ອງໃຫ້ບັນລຸໃນມູນຄ່າ 25.213 ຕື້ກີບ ເປັນຢ່າງຫນ້ອຍ, ຈັດຫາແຫລ່ງດຸນດ່ຽງໃຫ້ໄດ້ 4.500 ຕື້ກີບ ແລະ ເຄັ່ງຄັດການປະຕິບັດລາຍຈ່າຍໃຫ້ຢູ່ 29.700 ກວ່າຕື້ກີບ ພ້ອມດຽວກັນນີ້ຕ້ອງຕັ້ງຫນ້າສ້າງຄັງສະສົມແຫ່ງລັດໃຫ້ໄດ້ຕາມຂອບຂອງແຜນການ 5 ປີທີ່ກໍານົດໄວ້ 2-5% ຕໍ່ສົກງົບປະມານ, ປະຕິບັດວິໄນການເງິນ, ກົດຫມາຍງົບປະມານ, ກົດຫມາຍພາສີ, ອາກອນ, ກົດຫມາຍ ທີ່ດິນໃຫ້ເຂັ້ມງວດ ແລະ ໃຫ້ເອົາໃຈໃສ່ພິເສດຕໍ່ການປະຕິບັດກົດຫມາຍວ່າດ້ວຍການຕ້ານສໍ້ຫລາດບັງຫລວງຢ່າງແຂງແຮງສະກັດກັ້ນໃຫ້ໄດ້ການ ຮົ່ວໄຫລຂອງງົບປະມານເປັນຕົ້ນການຍົກເວັ້ນພາສີ-ອາກອນນໍາເຂົ້າ-ສົ່ງອອກສິນຄ້າ, ການເກັບພາສີທີ່ດິນ ແລະ ການຂາຍໄມ້ອອກໄປຕ່າງປະເທດ, ທ່ານນາຍົກລັດຖະມົນຕີກ່າວແນະນຳ.
ພິເສດປະຈຸບັນລັດຈະມອບໃຫ້ສັງຄົມ ແລະ ສື່ມວນຊົນເຂົ້າຮ່ວມສ່ອງແສງຂໍ້ມູນຄວາມຈິງທີ່ເຮັດໃຫ້ລາຍຮັບຂອງລັດຕົກເຮ່ຍເສຍຫາຍ ເມື່ອມີຄໍາສະເຫນີມາແມ່ນໃຫ້ດໍາເນີນການກວດກາທັນທີ, ຖ້າມີຄວາມຜິດກໍ່ໃຫ້ດໍາເນີນການແກ້ໄຂຕາມກົດຫມາຍ ຢ່າງທັນການ ໂດຍລັດຈະໃຫ້ການປົກປ້ອງ ແລະ ສັນລະເສີນຜູ້ທີ່ໃຫ້ເບາະແສຢ່າງເປັນທໍາ, ທ່ານນາຍົກກ່າວ.
ທ່ານ ທອງສິງ ທໍາມະວົງ ກ່າວຕື່ມວ່າ: ຫົວຫນ່ວຍວິສາຫະກິດ, ທຸລະກິດ, ຜູ້ປະກອບການ ແລະ ປະຊາຊົນຕ້ອງຕື່ນຕົວເສຍພັນທະພາສີອາກອນຕາມກົດຫມາຍກໍານົດ, ຜູ້ເສຍພາສີ-ອາກອນແມ່ນຜູ້ຮັກຊາດ ແລະ ແມ່ນນັກພັດທະນາຫາກເປົ້າຫມາຍໃດຫລົບຫລີກການເສຍພາສີ-ອາກອນຕ້ອງຖືກຕິຕຽນ, ປັບໄຫມ ແລະ ລົງວິໄນຕາມກົດຫມາຍກົງກັນຂ້າມຫົວຫນ່ວຍໃດທີ່ປະຕິບັດໄດ້ ຫລື ລື່ນຄາດຫມາຍລັດຖະບານຈະຍ້ອງຍໍຊົມເຊີຍ ແລະ ກວດກາສໍາຫລວດກວດກາຫົວຫນ່ວຍທີ່ບໍ່ໄດ້ຄາດຫມາຍ ເພື່ອພ້ອມກັນແກ້ໄຂ.
ແນວໃດກໍ່ຕາມ ເພື່ອຄວາມໂປ່ງໃສ, ຊັດເຈນ ແລະ ຄວາມວ່ອງໄວໃນສົກ 2013-2014 ນີ້ລັດຖະບານໄດ້ເລີ່ມໃຫ້ນຳໃຊ້ລະບົບເອເລັກໂຕຣນິກເຂົ້າໃນການເກັບລາຍຮັບ ໂດຍໄລຍະເລີ່ມຕົ້ນຈະທົດລອງເກັບອາກອນຍານພາຫະນະກ່ອນຫລັງຈາກນັ້ນຈິ່ງຂະຫຍາຍອອກສູ່ ຂະແຫນງການອື່ນ ໂດຍອີງຕາມຜົນໄດ້ຮັບຕົວຈິງໃນການທົດລອງ.
Ecom
