ແຜນຜັງຕົວເມືອງໃໝ່ຢູ່ຫນອງປິງ ຖືກສ້າງສຳເລັດແລ້ວ

ປີ 2008 ລັດ­ຖະ­ບານ​ລາວ ໄດ້​ສະ­ເໜີ​ໄປ​ຍັງ​ລັດ­ຖະ­ບານ​ຍີ່­ປຸ່ນ ເພື່ອ​ຂໍ​ການ​ຊ່ວຍ­ເຫຼືອ​ໃນ​ການ​ປັບ­ປຸງ​ແຜນ­ຜັງ​ຊີ້​ນຳ​ລວມ​ນະ­ຄອນ­ຫຼວງ​ວຽງ​ຈັນ​ຄືນ­ໃໝ່ ເປັນ​ສະ­ບັບ​ທີ 3 ຫຼັງ​ຈາກ​ນັ້ນ ລັດ­ຖະ­ບານ​ຍີ່­ປຸ່ນ ກໍ​ໄດ້​ມອບ​ໃຫ້​ອົງ­ການ​ຮ່ວມ​ມື​ສາ­ກົນ​ຂອງ​ຍີ່­ປຸ່ນ (JICA) ມາ​ທຳ​ການ​ເກັບ​ກຳ​ຂໍ້​ມູນ ແລະ ສຶກ​ສາ​ວາງ​ແຜນ­ຜັງ​ຊີ້​ນຳ​ລວມ​ນະ­ຄອນ­ຫຼວງ​ວຽງ​ຈັນ ຮ່ວມ​ກັບ​ສະ​ຖາ​ບັນ​ໂຍ­ທາ ແລະ ຂົນ­ສົ່ງ ພະ​ແນກ​ໂຍ­ທາ​ທິ​ການ ແລະ ຂົນ­ສົ່ງ​ນະ­ຄອນ­ຫຼວງ ໂດຍ​ໄດ້​ວາງ​ວິ­ໄສ​ທັດ​ເຖິງ​ປີ 2030 ໄດ້​ຮ່ວມ​ກັນ​ຈັດ​ຕັ້ງ​ປະ­ຕິ­ບັດ ແລະ ສຳ­ເລັດ​ໃນ​ເດືອນ​ມີ­ນາ 2011 ຊຶ່ງ​ຜົນ​ການ​ສຳ​ຫຼວດ​ເກັບ​ກຳ​ຂໍ້​ມູນ ແລະ ການ​ຄາດ​ຄະ­ເນ​ຂອງ​ອົງ­ການ​ໄຈ​ກາ ປະ­ຊາ­ກອນ​ນະ­ຄອນ­ຫຼວງ ຈະ​ເພີ່ມ​ຂຶ້ນ​ຈາກ 740.000 ຄົນ ມາ​ເປັນ 1,44 ລ້ານ​ຄົນ ໃນ​ປີ 2030 ສະ­ເພາະ​ອັດ­ຕາ​ຄວາມ​ໜາ​ແໜ້ນ​ໃນ​ຕົວ​ເມືອງ ເທົ່າ​ກັບ 30,6 ຄົນ​ຕໍ່​ເຮັກ­ຕາ.

ເພື່ອ​ຮອງ​ຮັບ​ການ​ເພີ່ມ​ຂຶ້ນ​ຂອງ​ປະ­ຊາ­ກອນ​ໃນ​ອະ­ນາ­ຄົດ ຈຳ­ເປັນ​ຕ້ອງ​ໄດ້​ມີ​ການ​ພັດ­ທະ­ນາ​ຕົວ​ເມືອງ ເພື່ອ​ດຶງ​ດູດ​ຄົນ​ຈຳ­ນວນ​ຫຼາຍ ແລະ ເປັນ​ສູນ​ກາງ­ຂອງ​ກິດ­ຈະ­ກຳ​ທາງ​ດ້ານ​ເສດ­ຖະ­ກິດ ອຸດ­ສາ­ຫະ­ກຳ ແລະ ວັດ­ທະ­ນະ­ທຳ ແຕ່​ໃນ​ຂະ­ນະ​ດຽວ​ກັນ ຕົວ​ເມືອງ​ຕ້ອງ​ເປັນ​ສະ­ຖານ­ທີ່ໆ​ຢູ່​ຮ່ວມ​ກັບ​ສິ່ງ­ແວ­ດລ້ອມ​ທີ່​ເປັນ​ທຳ​ມະ​ຊາດ ເພື່ອ​ລໍ່​ລ້ຽງ​ການ​ດຳ­ລົງ​ຊີ­ວິດ​ສ່ວນ​ໃຫຍ່​ຂອງ​ບັນ­ດາ​ປະ­ເທດ​ທີ່​ພັດ­ທະ­ນາ​ແລ້ວ ປະ­ຊາ­ຊົນ​ມີ​ຊີ­ວິດ​ການ​ເປັນ​ຢູ່​ທີ່​ອຸ­ດົມ­ສົມ­ບູນ ແລະ ມີ​ຄວາມ­ສຸກ ຍ້ອນ​ຄວາມ​ຈະ­ເລີນ​ກາຍ­ເປັນ​ຕົວ​ເມືອງ ທີ່​ເກີດ​ຈາກ​ການ​ຂະ­ຫຍາຍ­ຕົວ​ທາງ​ດ້ານ​ເສດ­ຖະ­ກິດ ແຕ່​ກົງ­ກັນ­ຂ້າມ​ໃນ​ການ​ພັດ­ທະ­ນາ​ໃຫ້​ກາຍ­ເປັນ​ຕົວ​ເມືອງ​ນັ້ນ ພວກ​ເຂົາ­ເຈົ້າ​ໄດ້​ສູນ​ເສຍ​ຄວາມ​ເປັນ​ເອ­ກະ­ລັກ​ທີ່​ມີ​ຄຸນ­ຄ່າ ເຊັ່ນ: ປະ­ຫວັດ­ສາດ ຮີດ­ຄອງ​ປະ­ເພ­ນີ ແລະ ສິ່ງ­ແວ­ດລ້ອມ​ທຳ​ມະ​ຊາດ​ໄປ.

ໂດຍ​ຖອດ​ຖອນ​ເອົາ​ບົດ­ຮຽນ​ຈາກ​ກໍ­ລະ­ນີ​ທີ່​ຜິດ­ພາດ​ຂອງ​ປະ­ເທດ​ທີ່​ພັດ­ທະ­ນາ​ແລ້ວ​ນັ້ນ ການ​ພັດ­ທະ­ນາ ແລະ ການ​ຂະ­ຫຍາຍ­ຕົວ​ຂອງ​ຕົວ​ເມືອງ ຕ້ອງ​ເປັນ​ມິດ​ກັບ​ສິ່ງ­ແວ­ດລ້ອມ​ແບບ​ຍືນ​ຍົງ ໜອງ​ປີງ ແມ່ນ​ໜອງ​ທຳ​ມະ​ຊາດ​ອີກ​ແຫ່ງ​ໜຶ່ງ ຊຶ່ງ​ຕັ້ງ​ຢູ່​ເຂດ​ອ້ອມ​ຮອບ​ໃຈ­ກາງ​ຕົວ​ເມືອງ ມີ​ບົດ­ບາດ​ໃນ​ການ​ຮອງ​ຮັບ​ເກັບ​ກັກ​ນ້ຳ​ໃນ​ລະ­ດູ­ຝົນ ແລະ ບ່ອນ​ບຳ­ບັດ​ນ້ຳ​ເປື້ອນ​ໄຫຼ​ຜ່ານ​ຮ່ອງ​ແຊງŒບຶງທາດ­ຫຼວງ ຊຶ່ງ​ໄລ­ຍະ​ບໍ່​ທໍ່​ໃດ​ປີ­ຜ່ານ­ມາ ໜອງ​ດັ່ງ­ກ່າວ​ແມ່ນ​ຖືກ​ຖົມ​ເພື່ອ​ປຸກ​ສ້າງ​ເຮືອນ​ອາ­ໄສ​ຊະ­ຊາຍ ໂດຍ​ບໍ່​ໄດ້​ມີ​ການ​ວາງ​ແຜນ ເຮັດ​ໃຫ້​ສະ­ພາບ​ແວດ​ລ້ອມ​ມີ​ການ​ປ່ຽນ­ແປງ ຖ້າ​ພວກ​ເຮົາ​ບໍ່​ມີ​ວິ­ທີ​ການ​ວາງ​ແຜນ​ຄຸ້ມ​ຄອງ​ແລ້ວ ຈະ​ເກີດ​ບັນ­ຫາ​ຕາມ​ມາ​ໃນ​ອະ­ນາ­ຄົດ.

ຍ້ອນ​ເຫັນ​ໄດ້​ຄວາມ​ສຳ­ຄັນ​ຄື​ແນວ​ນັ້ນ ນະ­ຄອນ­ຫຼວງ ຈຶ່ງ​ໄດ້​ຕົກ­ລົງ​ມອບ​ໃຫ້​ບໍ­ລິ­ສັດ​ນິກ​ເກັງ​ເຊັກ​ເກ ວິ­ສະ­ວະ­ກຳ​ກໍ່­ສ້າງ ຈຳ­ກັດ ປະ­ເທດ​ຍີ່­ປຸ່ນ ມາ​ດຳ­ເນີນ​ການ​ສຶກ​ສາ ວາງ​ແຜນ­ຜັງ​ລະ­ອຽດ ໜອງ​ປີງ ເມືອງ​ຈັນ­ທະ​ບູ​ລີ ຕາມ​ຂໍ້​ຕົກ­ລົງ​ຂອງ​ທ່ານ​ເຈົ້າ​ຄອງ​ນະ­ຄອນ­ຫຼວງ ແລະ ໄດ້​ເຊັນ​ສັນ­ຍາ​ຮັບ​ເໝົາ ຄັ້ງ​ວັນ​ທີ 14/10/2010 ກວມ​ເອົາ​ເນື້ອ­ທີ່​ທັງ​ໝົດ 1.930 ເຮັກ­ຕາ ລວມ​ມູນ​ຄ່າ​ຂອງ​ການ​ຮັບ​ເໝົາ​ທັງ​ໝົດ 990.000 ໂດ​ລາ​ສະ­ຫະ­ລັດ ຫຼື ປະ­ມານ 7,9 ຕື້​ກີບ ໂດຍ​ໄດ້​ແບ່ງ​ເປັນ 2 ໄລ­ຍະ ປະ­ກອບ​ມີ​ບັນ­ດາ​ໜ້າ​ວຽກ​ຄື: ໄລ­ຍະ​ທີ 1 ສຳ​ຫຼວດ​ວັດ­ແທກ​ລະ­ດັບ​ໜ້າ­ດິນ ເກັບ​ກຳ​ຂໍ້​ມູນ​ປະ​ເມີນ ແລະ ວິ­ເຄາະ​ສະ­ພາບ​ປັດ­ຈຸ­ບັນ ກຳ­ນົດ​ແນວ​ຄິດ​ຂອງ​ການ​ພັດ­ທະ­ນາ ສຶກ​ສາ​ຕົວ​ວັດ­ແທກ​ທີ່​ສຳ­ຄັນ ວິ­ໄສ​ທັດ​ການ​ນຳ​ໃຊ້​ທີ່​ດິນ ວິ­ໄສ​ທັດ​ແຜນ​ພື້ນ­ຖານ​ໂຄງ​ລ່າງ ແລະ ແຜນ​ວາດ​ທິວ​ທັດ ແລະ ໄລ­ຍະ 2 ແຜນ­ຜັງ​ລະ­ອຽດ​ຂອງ​ການ​ນຳ​ໃຊ້​ທີ່​ດິນ ແຜນ­ຜັງ​ທີ່​ຕັ້ງ​ຂອງ​ສະ­ຖານ­ທີ່ ແລະ ແຜນ­ຜັງ​ສະ​ຖາ​ປັດ ແຜນ​ພື້ນ­ຖານ​ໂຄງ​ລ່າງ ສຶກ​ສາ​ຍຸດ​ທະ​ສາດ​ການ​ເຮັດ​ວຽກ ແລະ ວາງ​ແຜນ​ພັດ­ທະ­ນາ​ເປັນ​ແຕ່​ລະ​ໄລ­ຍະ ປະ​ເມີນ​ຜົນ​ກະ­ທົບ​ສິ່ງ­ແວ­ດລ້ອມ​ຢ່າງ​ມີ​ຍຸດ​ທະ​ສາດ ອອກ​ແບບ​ຜັງ​ຕົວ​ເມືອງ ແລະ ສ້າງ​ຮູບ​ພາບ​ການ​ພັດ­ທະ­ນາ.

ພາຍ­ຫຼັງ​ໄດ້​ເຊັນ​ສັນ­ຍາ​ວ່າ​ຈ້າງ​ນິກ​ເກັງ​ເຊັກ​ເກ ວິ­ສະ­ວະ­ກຳ​ກໍ່­ສ້າງ ຈຳ­ກັດ​ແລ້ວ ກໍ​ໄດ້​ດຳ­ເນີນ​ການ​ສຶກ​ສາ ສຳ​ຫຼວດ​ອອກ​ແບບ​ລະ­ອຽດ ນັບ​ແຕ່​ເດືອນ​ຕຸ­ລາ 2010 ເປັນ­ຕົ້ນ​ມາ ໂດຍ​ໃຊ້​ເວ­ລາ 8 ເດືອນ ສຳ­ເລັດ​ໂດຍ​ສົມ­ບູນ ຊຶ່ງ​ພາຍ­ຫຼັງ​ສຳ­ເລັດ ກໍ​ໄດ້​ເຂົ້າ​ຜ່ານ​ກອງ​ປະ­ຊຸມ​ເຈົ້າ​ຄອງ ຮອງ​ເຈົ້າ​ຄອງ ຄັ້ງ​ວັນ​ທີ 22/8/2011 ໄດ້​ຕົກ­ລົງ​ເຫັນ​ດີ​ຮັບ­ຮອງ​ເອົາ​ໂດຍ​ພື້ນ­ຖານ ແລະ ຕອນ​ແລງ​ວັນ​ທີ 26 ສິງ­ຫາ 2011 ຜ່ານ​ມາ ກໍ​ໄດ້​ຈັດ​ພິ​ທີມ​ອບŒຮັບ​ເອົາ​ແຜນ­ຜັງ​ດັ່ງ­ກ່າວ​ຢ່າງ​ເປັນ​ທາງ​ການ ຂຶ້ນ​ທີ່​ຫ້ອງ​ວ່າ­ການ​ປົກ­ຄອງ​ນະ­ຄອນ­ຫຼວງ ເຊັ່ນ​ມອບ​ໂດຍ​ທ່ານ ຟູ​ຊີ​ຕະ ຄະ­ນະ​ບໍ­ລິ­ຫານ​ງານ​ບໍ­ລິ­ສັດ​ນິ​ເກັງ​ເຊັກ​ເກ ວິ­ສະ­ວະ­ກຳ​ກໍ່­ສ້າງ ຈຳ­ກັດ ແຫ່ງ ປະ­ເທດ​ຍີ່­ປຸ່ນ ແລະ ເຊັນ​ຮັບ​ເອົາ​ໂດຍ​ທ່ານ ແກ້ວ​ພິ­ລາ​ວັນ ອາ​ໄພ​ລາດ ຮອງ​ເຈົ້າ​ຄອງ​ນະ­ຄອນ­ຫຼວງ ຫົວ­ໜ້າ​ພະ​ແນກ​ໂຍ­ທາ​ທິ​ການ ແລະ ຂົນ­ສົ່ງ​ນະ­ຄອນ­ຫຼວງ ໃຫ້​ກຽດ​ເຂົ້າ​ຮ່ວມ​ຂອງ​ທ່ານ ສຸ​ກັນ ມະ­ຫາ­ລາດ ເຈົ້າ​ຄອງ​ນະ­ຄອນ­ຫຼວງ​ວຽງ​ຈັນ ທ່ານ​ທີ່​ປຶກ­ສາ​ທູດ​ຍີ່­ປຸ່ນ ປະ­ຈຳ​ລາວ.

ໃນ​ການ​ມອບ​ສົ່ງ​ຜົນ­ງານ​ສຸດ​ທ້າຍ ເຊິ່ງ​ປະ­ກອບ​ມີ: 1.ບົດ​ລາຍ​ງານ​ສຸດ​ທ້າຍ 2.ແຜນ​ວາດ​ການ​ວາງ​ແຜນ​ຜັງ­ເມືອງ​ລະ­ອຽດ 1 ສ່ວນ 2.000 (1/2.000) 3.ແຜນ​ວາດ​ແຜນ​ນະ­ໂຍ­ບາຍ​ການ​ພັດ­ທະ­ນາ​ໂຄງ​ລ່າງ 1 ສ່ວນ 2.000 4.ຮູບ​ທີວ​ທັດ​ຕົວ​ເມືອງ ແລະ 5.ແບບ​ຈຳ­ລອງ​ຕົວ​ເມືອງ.

vientianemai

Posted by samakomlao on 10:24 PM. Filed under development, developments . You can follow any responses to this entry through the RSS 2.0. Feel free to leave a response