ຄອນເສີດອາຊຽນ ຄັ້ງທີ 1 ຈະຈັດຂຶ້ນໃນກາງເດືອນມັງກອນ 2012 ທີວຽງຈັນ

*(ຂປລ):ກະຊວງຖະແຫລງຂ່າວ-ວັດທະນະທຳ ແລະ ທ່ອງທ່ຽວ, ຄະນະກຳມະການຖະແຫລງຂ່າວ-ວັດ ທະນະທຳອາຊຽນ ສປປລາວ ແລະ ບໍລິສັດ ວາເລັນທາຍມິວສິກ ໄດ້ຈັດງານຖະແຫລງຂ່າວ ກ່ຽວກັບການ ຈັດງານຄອນເສີດອາຊຽນຄັ້ງທີ 1 ຂຶ້ນໃນວັນທີ່ 29 ທັນວາ 2011 ທີ່ສະມາຄົມນັກຂ່າວ ແຫ່ງ ສປປລາວ.

ທ່ານ ໄຊສະຫວາດ ສິງນາມວົງ, ຫົວໜ້າກົມສິລະປະການສະແດງໄດ້ກ່າວວ່າ: ງານສະແດງຄອນເສີດ ອາຊຽນ ຄັ້ງທີ 1 ຈະໄດ້ຈັດຂຶ້ນໃນວັນທີ່ 20-21 ມັງກອນ 2012 ທີ່ຫໍວັດທະນະທຳແຫ່ງຊາດ ໂດຍຈະມີນັກ ຮ້ອງແຕ່ລະປະເທດສະມາຊິກອາຊຽນ 10 ປະເທດ ຈະໄດ້ເຂົ້າຮ່ວມ ຊຶ່ງມີປະເທດລາວ, ບລູໄນ, ກຳປູເຈຍ, ອິນໂດເນເຊຍ, ມາເລເຊຍ, ມຽນມາ, ຟີລີບປິນ, ສິງກະໂປ, ໄທ ແລະ ຫວຽກນາມ. ໂດຍໄດ້ ຮັບການອຸປະຖຳຫລັກ ຈາກທະນາຄານການຄ້າຕ່າງ ປະເທດລາວ.

ທັງນີ້ເພື່ອເປັນການສະເຫລີມສະຫລອງວັນສຳຄັນທາງປະຫວັດສາດ, ເປັນການແລກປ່ຽນຖອດຖອນບົດ ຮຽນທາງດ້ານວັດທະນະທຳ ແລະ ການສະແດງ, ເຮັດໃຫ້ໄວໜຸ່ມລາວກ້າສະແດງອອກ ແລະ ໄດ້ຮັບຮູ້ການພັດທະ ນາຂອງປະເທດອື່ນໆເພື່ອໃຫ້ລາວກ້າວສູ່ສາກົນ, ເພື່ອເຜີຍແຜ່ວັດທະນະທຳ ແລະ ສົ່ງເສີມ ການທ່ອງທ່ຽວ. ນອກນີ້ວຽກງານການ ສະແດງສິລະປະວັນນະຄະດີ ກໍແມ່ນຂະແໜງໜຶ່ງທີ່ໄດ້ຮັບການພັດທະນາ ແລະ ຂະຫຍາຍຕົວຢ່າງໄວວາ ໂດຍສະ ເພາະແມ່ນ ເພງລູກທົ່ງບ້ານນາ ທີ່ຄວນອະນຸລັກ ແລະ ສົ່ງເສີມ, ສ່ວນເພງສະຕິງ ທີ່ກຳລັງໄດ້ຮັບຄວາມນິຍົມ ກໍຕ້ອງສົ່ງເສີມ ເພື່ອໃຫ້ທຽບເທົ່າກັບສາກົນ.