Update ການສ້າງເຂດນິຄົມອຸດສາຫະກໍາ ແລະ ການຄ້າ

ນັກ​ລົງ­ທຶນ​ຈີນ​ໄດ້​ຈົກ​ເງິນໄປ​ແລ້ວ​ຫລາຍ​ກວ່າ 3 ລ້ານ​ໂດລາ​ສະ­ຫະ­ລັດ ກໍ່­ສ້າງ​ເຂດ​ນິ­ຄົມອຸດ­ສາ­ຫະ­ກຳ ແລະ ການ​ຄ້າ, ມາ​ຮອດ​ເວ­ລາ​ນີ້​ມີ​ຄວາມ​ຄືບຫນ້າ​ກາຍ​ເຄິ່ງ​ທາງ​ແລ້ວ ໂດຍ ຄາດ​ວ່າ​ຈະ​ໃຊ້​ທຶນ​ໃນ​ການ​ກໍ່ສ້າງ​ທັງ​ຫມົດ​ປະ­ມານ 70 ລ້ານກວ່າ​ໂດ​ລາ ແລະ ໃຫ້​ສຳ­ເລັດ​ໃນອີກ 5 ປີ.

ທ່ານ ເຊີນ​ຈຸ້ນ ເສີນ ຜູ້​ອຳ­ນວຍການ​ບໍ­ລິ­ສັດ​ລາວ​ວິ​ຕາ (ເຂດ​ນິຄົມ​ອຸດ­ສາ­ຫະ­ກຳ ແລະ ການຄ້າ) ໄດ້​ເປີດ­ເຜີຍ​ຕໍ່​ນັກ​ຂ່າວ​ຫນັງສື​ພິ​ມ​ເສດ­ຖະ­ກິດ-ສັງ­ຄົມ​ເມື່ອ​ອາທິດ​ຜ່ານ​ມາ​ນີ້​ໃຫ້​ຮູ້​ວ່າ: ພາຍຫລັງ​ທີ່​ໄດ້​ເຮັດ​ບົດ​ບັນ­ທຶກ​ຮ່ວມກັບ​ລັດ­ຖະ­ບານ​ແຫ່ງ ສປປ ລາວ ໃນ​ປີ 2009 ໂດຍ​ລັດ­ຖະ­ບານລາວ​ຖື​ຮຸ້ນ 30% ແລະ ນັກ​ທຸ­ລະກິດ​ຈີນ​ຖື​ຮຸ້ນ 70% ໃນ​ໄລ­ຍະ​ສຳປະ­ທານ 70 ປີ, ຫລັງ​ຈາກ​ນັ້ນ ມາ​ໃນ​ຕົ້ນ​ປີ 2011 ບໍ­ລິ­ສັດ​ລາວວິ​ຕາ​ເລີ່ມ​ລົງ­ມື​ກໍ່­ສ້າງ​ເຂດ​ນິ­ຄົມອຸດ­ສາ­ຫະ­ກຳ ແລະ ການ​ຄ້າ​ທີ່​ກິໂລ​ແມັດ​ຫລັກ 22 ເມືອງ​ໄຊ​ທານີ ນະ­ຄອນ­ຫລວງ​ວຽງ​ຈັນ ໃນເນື້ອ­ທີ່​ທັງ​ຫມົດ 110 ເຮັກ­ຕາ, ມາ​ຮອດ​ປະ­ຈຸ​ບັນການ​ກໍ່­ສ້າງໂຄງ­ການ​ດັ່ງ­ກ່າວ​ມີ​ຄວາມ​ຄືບຫນ້າ​ໄປ​ແລ້ວ 60%, ໂດຍ​ໄດ້​ສຳເລັດ​ການ​ກໍ່­ສ້າງ​ພື້ນ­ຖານ​ໂຄງລ່າງ ເພື່ອ​ຮອງ​ຮັບ​ການ​ລົງ­ທຶນຈາກ​ນັກ­ທຸ­ລະ­ກິດ​ທັງ​ພາຍ​ໃນ ແລະ ຕ່າງ­ປະ­ເທດ​ທີ່​ສົນ­ໃຈ​ເຂົ້າມາ​ລົງ­ທຶນ​ສ້າງ​ໂຮງ​ຈັກ​ໂຮງງານ​ອຸດ­ສາ­ຫະ­ກຳ​ໃນ​ເຂດ​ນີ້.

ທ່ານ ເຊີນ​ຈຸ້ນ ເສີນ ແຈ້ງ​ໃຫ້ຮູ້​ວ່າ: ມາ​ຮອດ​ເວ­ລາ​ນີ້ ທາງ​ບໍ​ລິສັດ​ໄດ້​ໃຊ້​ງົບ­ປະ­ມານ​ເຂົ້າ​ໃນການ​ກໍ່­ສ້າງ​ໃນ​ເບື້ອງ​ຕົ້ນ​ໄປ​ແລ້ວ 3 ລ້ານ​ກວ່າ​ໂດ​ລາ, ຄາດ​ວ່າຫມົດ​ປີ 2012 ການ​ກໍ່­ສ້າງ​ຈະຄືບ​ຫນ້າ​ໃນ​ລະ­ດັບ 80% ແລະ ຈະ​ໃຊ້​ທຶນ​ໃນ​ການ​ກໍ່­ສ້າງ​ປະມານ 10 ລ້ານ​ໂດ​ລາ​ສະ­ຫະ­ລັດ, ຫລັງ​ຈາກ​ນັ້ນ​ອີກ 4 ປີ​ຂ້າງ​ຫນ້າການ​ສ້າງ​ເຂດ​ນິ­ຄົມ​ອຸດ​ສາ​ຫະກຳ ແລະ ການ​ຄ້າ​ດັ່ງ­ກ່າວ​ກໍ່​ຈະສຳ­ເລັດ​ຢ່າງ​ສົມ­ບູນ ຄາດ​ຈະ​ໃຊ້ທຶນ​ທັງ​ຫມົດ​ບໍ່​ຕ່ຳ​ກວ່າ 70 ລ້ານກວ່າ​ໂດ​ລາ​ສະ­ຫະ­ລັດ.

ທ່ານ ເຊີນ​ຈຸ້ນ ເສີນ ກ່າວ​ຢ້ຳວ່າ: ເມື່ອ​ເຂດ​ນິ­ຄົມ​ອຸດ­ສາ­ຫະ­ກຳ ແລະ ການ​ຄ້າ ສ້າງ​ສຳ­ເລັດ​ຈະ​ມີຫລາຍ​ເງື່ອນ­ໄຂ​ທີ່​ອຳ­ນວຍຄວາມ​ສະ­ດວກ​ໃຫ້​ແກ່​ການ​ລົງທຶນ, ຊີ­ວິດ​ການ​ເປັນ​ຢູ່​ຂອງ​ປະຊາ​ຊົນ​ຈະ​ໄດ້​ຮັບ​ການ​ພັດ­ທະ­ນາດີ​ຂຶ້ນ, ຈະ​ສ້າງ​ວຽກ​ເຮັດ​ງານ​ທຳຫລາຍ​ຢ່າງ, ຍົກ​ສູງ​ດ້ານ​ເຕັກ­ນິກວິ­ຊາ​ການ​ທາງ​ການ​ກໍ່­ສ້າງຕ່າງໆ ທີ່​ສຳ­ຄັນ​ຄື​ສ້າງ​ລາຍ​ໄດ້ແກ່​ລັດ­ຖະ­ບານ​ລາວ, ນິ­ຄົມ​ອຸດສາ​ຫະ​ກຳ ແລະ ການ​ຄ້າຈະ​ເຮັດ ໃຫ້ ສປປ ລາວ ມີ​ໃບ​ຫນ້າ​ໃຫມ່ໃນ​ເວ­ທີ​ສາ­ກົນ ໂດຍ​ສະ­ເພາະສ້າງ​ບົດ­ບາດ​ດ້ານ​ການ​ລົງ­ທຶນທີ່​ສາ­ມາດ​ດຶງ​ດູດ​ເອົາ​ນັກ​ທຸ­ລະກິດ​ຕ່າງ­ປະ­ເທດ​ໃຫ້​ເຂົ້າ​ມາ​ລົງທຶນ​ໃນ​ລາວ​ຫລາຍ​ຂຶ້ນ.

ecom

Posted by samakomlao on 11:28 AM. Filed under development, developments, Laos . You can follow any responses to this entry through the RSS 2.0. Feel free to leave a response