ອາເມລິກາຄື ຜູ້ໃຫ້ຄໍາຕອບສຸດທ້າຍ ໂຄ້ງເສັ້ນໄຊລາວເຂົ້າ WTO
ສປປ ລາວ ເດີນທາງເຖິງໂຄງສຸດທ້າຍແລ້ວ ສຳລັບເສັ້ນໄຊຂອງການເຂົ້າເປັນສະມາຊິກອົງການຄ້າໂລກ ຫລື WTO ຫລັງໄດ້ມີຄວາມພະຍາຍາມມາເປັນເວລາ 10 ກວ່າປີ ເຊິ່ງປະຈຸບັນຍັງຄອຍຄຳຕອບສຸດທ້າຍ ຈາກສະຫະລັດອາເມລິກາທີ່ເປັນຫນຶ່ງໃນສະມາຊິກອົງການ ດັ່ງກ່າວ ດ້ານ ນຄຕ ແຈ້ງເງື່ອນໄຂ ໂດຍລວມຜ່ານຫມົດຍັງພຽງການປະຕິບັດດ້ານຊັບສິນທາງປັນຍາຂອງລາວທີ່ອາເມລິກາ ບອກຕ້ອງໄດ້ສຶກສາລະອຽດຕື່ມ.
ວານນີ້ ທີ່ໂຮງແຮມລາວພລາຊາ ນະຄອນຫລວງວຽງຈັນໄດ້ຈັດກອງປະຊຸມຄະນະປະສານງານລະດັບຊາດວ່າດ້ວຍການເຊື່ອມໂຍງເສດຖະກິດກັບສາກົນ (ຄປຊ) ຄັ້ງທີ 10 ເຊິ່ງໃຫ້ກຽດເປັນປະທານຂອງທ່ານ ດຣ. ນາມ ວິຍະເກດ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າ, ຮອງປະທານ ຄປຊ ໂດຍມີສະມາຊິກ ຄປຊ ຈາກກະຊວງຂະແຫນງການຕະຫລອດຮອດບັນດາສະມາຊິກກອງເລຂາການເຂົ້າເປັນສະມາຊິກອົງການ WTO ຂອງ ສປປ ລາວເຂົ້າຮ່ວມຄະນະຮັບຜິດຊອບກອງປະຊຸມແຈ້ງວ່າ: ຈຸດປະສົງຂອງການປະຊຸມຄັ້ງນີ້ແມ່ນເພື່ອຮັບຟັງການລາຍງານກ່ຽວກັບຜົນຂອງກອງປະຊຸມຫນ່ວຍງານຄັ້ງທີ 9 ແລະ ສະພາບການກະກຽມຈັດກອງປະຊຸມຄັ້ງທີ 10 ເຊິ່ງເປັນຄັ້ງສຸດທ້າຍ ແລະ ຈະຈັດຂຶ້ນໃນວັນທີ 14 ກັນຍານີ້ ພ້ອມທັງປຶກສາຫາລືແຜນການກະກຽມສຳເລັດຂັ້ນຕອນສຸດທ້າຍໃນການເຂົ້າເປັນສະມາຊິກ WTO ພ້ອມດຽວກັນນັ້ນຍັງຈະປຶກສາຫາລືກ່ຽວກັບບົດສະຫລຸບຜົນການເຈລະຈາທີ່ໄດ້ນຳສະເຫນີຜົນຂອງເຈລະຈານັ້ນມາລາຍງານແກ່ລັດຖະບານໄດ້ຮັບຊາບ ພາຍຫລັງທີ່ອົງການຄ້າໂລກຮັບເອົາ ສປປ ລາວ ເຂົ້າເປັນສະມາຊິກລວມທັງບັນດາພັນທະທີ່ລາວຈະໄດ້ຈັດຕັ້ງປະຕິບັດ.
ຢ່າງໃດກໍ່ຕາມ ທ່ານ ດຣ. ນາມ ວິຍະເກດ ລັດຖະມົນຕີວ່າການກະຊວງອຸດສາຫະກຳ ແລະ ການຄ້າໄດ້ກ່າວບາງຕອນໃນໂອກາດເປີດກອງປະຊຸມດັ່ງກ່າວວ່າ: ມາປະຈຸບັນກ່ຽວກັບການກະກຽມດ້ານເອກະສານຕ່າງໆໃນການເຂົ້າເປັນສະມາຊິກອົງການຄ້າໂລກແມ່ນເກືອບຈະສຳເລັດແລ້ວພຽງກອງປະຊຸມຄັ້ງດຽວທີ່ຈະດຳເນີນເພື່ອທົບທວນຄືນບົດລາຍງານທີ່ຈະເຊັນກັບອົງການຄ້າໂລກໃນເດືອນຕຸລາ ແລະ ໃນກາງເດືອນກັນຍາ 2012 ນີ້ ກໍ່ຈະມີການຈັດກອງປະຊຸມອີກຮອບຫນຶ່ງ.
ຕາມການກະກຽມໃນປະຈຸ ບັນ ສຳລັບເສັ້ນໄຊຂອງການເຂົ້າເປັນສະມາຊິກອົງການຄ້າໂລກຂອງ ສປປ ລາວ ຍັງລໍຖ້າຄຳຕອບສຸດທ້າຍຈາກປະເທດສະຫະລັດອາເມລິກາເທົ່ານັ້ນທີ່ເປັນຫນຶ່ງໃນຈຳນວນບັນດາປະເທດສະມາຊິກ ເຊິ່ງຖ້າຫາກອາເມລິກາໃຫ້ຄຳຕອບລາວຜ່ານໄດ້ກໍ່ຖືວ່າລາວໄດ້ເຂົ້າເປັນສະມາຊິກຖາວອນ ຫລັງໄດ້ມີການລົງນາມລະຫວ່າງລັດຖະບານ ສປປ ລາວ ແລະ ອົງການຄ້າການການຄ້າໂລກ.
ແນວໃດກໍ່ດີ ເຈົ້າຫນ້າທີ່ຈາກກົມນະໂຍບາຍການຄ້າຕ່າງປະເທດ (ນຄຕ) ກະຊວງອຸດສາຫະກຳ ແລະ ການຄ້າເປີດເຜີຍຕໍ່ທີມຂ່າວເສດຖະກິດວ່າ: ສະເພາະສະຫະລັດອາເມລິກາຜ່ານມາ ແມ່ນຍອມຮັບໃນປັດໄຈໂດຍລວມຂອງລາວເປັນທີ່ຮຽບຮ້ອຍແລ້ວ ຍັງພຽງແຕ່ດ້ານເງື່ອນໄຂການຈັດຕັ້ງປະຕິບັດຕໍ່ຊັບສິນທາງປັນຍາຂອງລາວ ເຊິ່ງອາເມລິກາຈະຕ້ອງໄດ້ສຶກສາລະອຽດ ຂະນະທີ່ລາວຜ່ານມາ ກໍ່ໄດ້ສ້າງເງື່ອນໄຂອຳນວຍໃນຫລາຍດ້ານເປັນຕົ້ນແມ່ນໄດ້ສ້າງກົດຫມາຍ ວ່າດ້ວຍຊັບສິນທາງປັນຍາລວມເຖິງກົດຫມາຍອື່ນໆທີ່ກ່ຽວຂ້ອງ ໂດຍເຊື່ອວ່າ ບໍ່ກາຍ 2012 ນີ້ ຫລື ບໍ່ຮອດກອງປະຊຸມອາເຊັມລາວເຂົ້າເປັນສະມາຊິກອົງການການຄ້າໂລກແນ່ນອນ.
ປະຈຸບັນ WTO ມີ 155 ສະມາຊິກໂດຍຣັດເຊຍ ແລະ ວານວາຕູຈະເຂົ້າເປັນສະມາຊິກສົມບູນທີ 156 ແລະ 157 ຕາມ ລຳດັບໃນທ້າຍເດືອນສິງຫານີ້ພາຍຫລັງທີ່ສອງປະເທດໄດ້ສຳເລັດການໃຫ້ສັດຕະຍາບັນບົນພື້ນຖານການຖືກຮອງຮັບເອົາເງື່ອນໄຂເຂົ້າເປັນສະມາຊິກໃນກອງປະຊຸມລະະດັບລັດຖະມົນຕີຄັ້ງທີ 8 ຂອງ WTO ທີ່ເຈນີວາໃນເດືອນກັນຍາ 2012 ນີ້.
Ecom
