10:50 AM | Posted by samakomlao

7 ວິທີເຮັດໃຫ້ຮູຂຸມຂົນນ້ອຍລົງ

ຜິວໃບຫນ້າທີ່ນຸ້ມນວນ ແລະ ຮູຂຸມຂົນນ້ອຍ ເປັນຜິວຫນ້າໃນຝັນຂອງແມ່ຍິງທັງຫລາຍ ໂດຍສະເພາະໃນກຸ່ມໄວຫນຸ່ມເຮັດໃຫ້ການແຕ່ງຫນ້າມີຄວາມສວຍງາມ ຫລື ຖ້າບໍ່ມີການແຕ່ງ ຫນ້າແຕ່ກໍ່ຍັງງາມເຊັ່ນເດີມ. ແຕ່ຈະເຮັດແນວໃດເພື່ອໃຫ້ຫນ້າຂອງທ່ານມີຄວາມນຸ້ມນວນແບບນັ້ນ, ມື້ນີ້ ຄໍລຳນາໆປະໂຫຍດມີ 7 ວິທີເຮັດໃຫ້ຮູຂຸມຂົນນ້ອຍລົງມາຝາກເດີ້.

ການຮັກສາຄວາມສະອາດ.

ການຮັກສາຄວາມສະອາດຂອງຜິວໃບຫນ້າເປັນວິທີພື້ນຖານທີ່ສຸດ ແຕ່ກໍ່ມີຄວາມສຳຄັນເປັນອັນດັບຫນຶ່ງໃນການເຮັດ ໃຫ້ຮູຂຸມຂົນນ້ອຍລົງ, ການທຳຄວາມສະອາດໃບຫນ້າເປັນການກຳຈັດຄວາມມັນສ່ວນເກີນ ແລະ ສິ່ງເປິເປື້ອນທີ່ມັກເຂົ້າໄປຕັນຮູຂຸມຂົນ ເຊິ່ງເປັນສາເຫດທີ່ເຮັດໃຫ້ຮູຂຸມຂົນໃຫຍ່ອອກ ແລະ ເຮັດໃຫ້ໃບຫນ້າຂອງທ່ານບໍ່ລຽບນຽນ.

ຄວນລ້າງຫນ້າມື້ລະ 2 ຄັ້ງ.

ການລ້າງຫນ້າມື້ລະ 2 ຄັ້ງໃນຕອນເຊົ້າ ແລະ ຕອນແລງ ເພື່ອເປັນການລ້າງສິ່ງເປິເປື້ອນອອກຈາກໃບຫນ້າ ໂດຍເລືອກໃຊ້ຜະລິດຕະພັນເຮັດຄວາມສະອາດໃບຫນ້າທີ່ບໍ່ເຮັດໃຫ້ຫນ້າແຫ້ງ ແລະ ຜະລິດຕະພັນລ້າງຫນ້າສູດເຢັນ ນອກຈາກຈະຊ່ວຍຄືນຄວາມສົດຊື່ນແລ້ວຍັງເຮັດໃຫ້ຮູຂຸມຂົນນ້ອຍລົງອີກດ້ວຍ.

ຫ້າມບໍ່ໃຫ້ເຂົ້ານອນທັງທີ່ຍັງແຕ່ງຫນ້າຢູ່.

ບໍ່ວ່າຈະເມື່ອຍເທົ່າໃດກໍ່ຕາມ ຫ້າມເຂົ້ານອນທັງໆທີ່ຍັງມີເຄື່ອງສຳອາງຢູ່ໃບຫນ້າຂອງທ່ານເດັດຂາດ, ຫາກເຂົ້ານອນທັງທີ່ຍັງບໍ່ລ້າງເຄື່ອງສຳອາງໃຫ້ຮຽບຮ້ອຍ ນອກຈາກຈະເຮັດໃຫ້ເຄື່ອງສຳອາງລົງໄປອັດຮູຂຸມຂົນໄດ້ງ່າຍແລ້ວ ຍັງເຮັດໃຫ້ໃບຫນ້າບໍ່ສົດໃສເມື່ອຍາມຕື່ນນອນ ແລະ ຫາກເຮັດເປັນປະຈຳຈະເຮັດໃຫ້ໃບຫນ້າຫມອງຄ້ຳ, ເຖົ້າກ່ອນໄວ ແລະ ເກີດຜົນເສຍຕໍ່ໃບຫນ້າໃນໄລຍະຍາວ.

ການຫມັກຫນ້າ.

ສາວໆຫລາຍຄົນຫມັກຫນ້າ ຫລື ຟອກຫນ້າ ເພື່ອຊ່ວຍໃຫ້ໃບຫນ້າເຕັ່ງຕຶງຂຶ້ນ ໂດຍວິທີການຫມັກຫນ້ານັ້ນກໍ່ມີໃຫ້ເລືອກໃຊ້ຫລາຍສູດ ເຊິ່ງລ້ວນແຕ່ຊ່ວຍບຳລຸງຜິວທັງນັ້ນ. ຢ່າງໃດກໍ່ຕາມ ຕ້ອງລະວັງຫມັກຫນ້າປະເພດຊ່ວຍຄວບຄຸມຄວາມມັນ ຫລື ການຟອກຫນ້າທີ່ຊ່ວຍດູດຊຶມນ້ຳມັນ ສ່ວນເກີນອອກຈາກໃບຫນ້າເພາະສຳລັບການຫມັກປະເພດນີ້ຫາກມີການເຮັດເກີນອາທິດລະຫນຶ່ງຄັ້ງຈະເຮັດໃຫ້ຜິວຂອງທ່ານແຫ້ງໄດ້ງ່າຍ.

ການຫມັກຫນ້າດ້ວຍໄຂ່ຂາວ.

ການຫມັກຫນ້າດ້ວຍວິທີນີ້ ບໍ່ຈຳເປັນຕ້ອງຊື້ຜະລິດຕະພັນທີ່ມີລາຄາແພງ, ພຽງແຕ່ໃຊ້ໄຂ່ຂາວໃນການຫມັກຫນ້າ ໂດຍທາໄຂ່ຂາວທີ່ໃບຫນ້າແລະທາຊ້ຳເປັນພິເສດບໍລິເວນທີ່ມີສິວ ຈາກນັ້ນ ໃຊ້ເຈ້ຍເຊັດຫນ້າ ຫລື ເຈ້ຍທິດຊູ້ແປະທັບລົງໄປແລ້ວຮີດໃຫ້ຕິດກັບໃບຫນ້າປະໄວ້ໃຫ້ແຫ້ງ ຫລັງຈາກນັ້ນ ຈິ່ງລອກເຈ້ຍໄຂ່ຂາວດຶງສິວ ແລະ ສິ່ງເປິເປື້ອນອອກຈາກຮູຂຸມຂົນ ໂດຍເຮັດໃຫ້ຮູຂຸມຂົນນ້ອຍລົງໄດ້, ນອກຈາກນີ້ ໂປຣຕິນໃນໄຂ່ຂາວຍັງຊ່ວຍບຳລຸງຜິວ ແລະ ກະຕຸ້ນການສ້າງຈຸລັງຜິວໃຫມ່ທັງຍັງຊ່ວຍດູດຊຶມຄວາມມັນສ່ວນເກີນເທິງໃບຫນ້າໄດ້ນຳອີກ.

ການຫມັກຫນ້າດ້ວຍຫມາກເຫລັ່ນ.

ການຫມັກຫນ້າດ້ວຍຫມາກເຫລັ່ນເປັນອີກສູດທີ່ເຮັດໄດ້ງ່າຍໆດ້ວຍຕົນເອງ ພຽງແຕ່ຝານຫມາກເຫລັ່ນເປັນແຜ່ນບາງໆເອົາໃນມັນອອກແລ້ວແປະໄວ້ໃຫ້ທົ່ວໃບຫນ້າ, ກົດ AHA ວິຕາ ມິນ A ແລະ C ໃນຫມາກເຫລັ່ນຈະຊ່ວຍເຮັດຄວາມສະອາດຮູຂຸມຂົນເຮັດໃຫ້ຫນ້າຂອງທ່ານສົດໃສ ແລະ ຍັງຊ່ວຍເຮັດໃຫ້ຮູຂຸມຂົນນ້ອຍລົງ.

ການໃຊ້ແຜ່ນລອກສິວ.

ແຜ່ນລອກສິວເປັນອີກທາງເລືອກຫນຶ່ງທີ່ເຮັດໃຫ້ທ່ານມີຜິວໃບຫນ້າສະອາດຂຶ້ນໄດ້ຢ່າງໄວວາ, ກາວຫນຽວໆທີ່ຄ່ອຍໆແຂງຕົວຈະຈັບເອົາສິ່ງເປິເປື້ອນທີ່ອຸດຕັນຮູຂຸມຂົນອອກມາເຮັດໃຫ້ ຮູຂຸມຂົນນ້ອຍລົງ ແຕ່ຂໍ້ຄວນລະວັງຄືຫ້າມໃຊ້ຖີ່ເກີນໄປເພາະຈະເຮັດໃຫ້ຜິວບາງ ແລະ ເປັນການລົບກວນຜິວຫນັງຫລາຍເກີນໄປ.

Ecom