11:46 AM | Posted by samakomlao

ຄູຝຶກ U-16 ລາວພໍໃຈກັບຜົນງານນັກເຕະ ຊີ້ ຕ້ອງເພີ່ມການຝຶກຊ້ອມ

ທ່ານ ຮັນຫອງອີລ ຄູຝຶກ ທີມຊາດລາວສະແດງຄວາມດີໃຈ ຫລັງນັດຊະນະໄຕ້ຫວັນ 5-0 ປະຕູ, ສາມາດຜ່ານເຂົ້າໄປຫລິ້ນໃນຮອບ 16 ທີມສຸດທ້າຍສຳເລັດທີ່ຈະແຂ່ງຂັນໃນປີ 2012 ແຕ່ຍັງມີຫລາຍຢ່າງຕ້ອງປັບປຸງ.

ຮັນຫອງອີລ ກ່າວວ່າ: ລູກທີມຂອງຕົນສະແດງຄວາມສາມາດໄດ້ດີຫລາຍ ເມື່ອຄັ້ງພົບກັບໄຕ້ຫວັນ ໂດຍສະເພາະເຄິ່ງເວລາທຳອິດທີ່ສາມາດເກັບປະຕູຫນີຫ່າງເຖິງ 4-0 ປະຕູ ແຕ່ເຄິ່ງຫລັງພວກເຮົາໄດ້ສັ່ງຜ່ອນເກມລົງເລັກນ້ອຍ ປ່ອຍໃຫ້ໄຕ້ຫວັນເປັນຝ່າຍບຸກແດ່ ແຕ່ຍັງບໍ່ເສຍປະຕູກ່ອນຈະມາໄດ້ປະຕູເພີ່ມອີກ 1 ປະຕູປິດທ້າຍເກມ ລວມທັງຫມົດ 5-0 ປະຕູ.

ຮັນຫອງອີລ ຢ້ຳວ່າ: ທຸກຢ່າງໃນເກມຂອງວັນນັ້ນເປັນໄປຕາມແຜນຂອງເຮົາທີ່ວາງໄວ້ຫມົດທຸກຢ່າງ ແລະ ນັກກີລາແຕ່ລະ ຄົນກໍ່ພາກັນປະຕິບັດຫນ້າທີ່ໄດ້ຢ່າງແມ້ນຢຳຈົນເກັບໄຊ ຊະນະໃນທີ່ສຸດ ແຕ່ຢ່າງໃດກໍ່ຕາມ ເບິ່ງສະພາບລວມນັກກີລາຂອງເຮົາຈະຕ້ອງຝຶກຊ້ອມໃຫ້ຫນັກຂຶ້ນຕື່່ມ ເພື່ອໄປສູ້ກັບ 16 ທີມສຸດທ້າຍໃນປີຕໍ່ໄປ.

ສຳລັບບານເຕະຊີງແຊ໋ມອາຊີຮອບ 16 ທີມສຸດທ້າຍຍັງບໍ່ມີ ການຕົກລົງເປັນທາງການວ່າ ຈະຈັດຂຶ້ນທີ່ປະເທດໃດຕ້ອງໄດ້ ລໍຖ້າຜົນການຕັດສິນຂອງຄະນະສະຫະພັນບານເຕະອາຊີໃນໄວໆນີ້ທີ່ຈະໄດ້ຮູ້ຜົນ.

ທີມຊາດລາວຊຸດ U-16 ປີ ຂອງປີນີ້ແມ່ນໄດ້ຮັບການຕອບຮັບຈາກແຮງເຊຍທົ່ວປະເທດເປັນຢ່າງຫລວງຫລາຍກວ່າຄັ້ງຜ່ານມາ ສ່ວນຜົນງານຂອງນັກເຕະກໍ່ອອກມາດີເລີ່ມຕົ້ນລາຍ ການບານເຕະຊີງແຊ໋ມອາຊີແຂ່ງຂັນ 5 ນັດເສຍຫນຶ່ງນັດ, ຊະນະກະປູເຈຍ, ຫວຽດນາມ ແຕ່ມາ ເສຍໃຫ້ຍີ່ປຸ່ນ, ສະເຫມີ ສ. ເກົາຫລີ ສຸດທ້າຍຊະນະໄຕ້ຫວັນ.