ການຂຶ້ນທະບຽນໂທລະສັບມືຖື ອາດມີປັນຫາ

*(ຂປລ) ກະຊວງ ​ໄປສະນີ ​​ໂທລະ​ຄົມ ​ແລະ ການ​ສື່ສານ​ໄດ້​ອອກ​ແຈ້ງ​ການ​ໃນ​ວັນ​ທີ 17 ຜ່ານ​ມາ​ນີ້​ວ່າ: ນັບ​ຕັ້ງ​ແຕ່​ວັນ​ທີ 1 ພະຈິກ 2011 ຫາ ວັນ​ທີ 1 ​ພຶດສະພາ 2012 ບັນດາ​ປະຊາຊົນ​ທຸກ​ຊັ້ນ​ຄົນ​ທົ່ວ​ປະ​ເທດ​ທີ່​ນຳ​ໃຊ້​ໂທລະສັບ​ ມື​ຖື​ແບບ​ຕື່ມ​ເງິນ​ຈະ​ຕອ້ງ​ກະກຽມ​ບັດປະ​ຈຳ​ຕົວ/​ໃບ​ຢັ້ງຢືນ​ທີ່ຢູ່ ​ແລະ ສຳ​ມະ​ໂນ​ຄົວ​ເພື່ອ​ນຳ ​ຕິດ​ໂຕໄປ​ຂຶ້ນ​ທະບຽນ​​ໃນ​ການ​ແຈ້ງ​​ເລກ​ໝາຍ​ໂທລະສັບ ​ຂອງ​ຕົນ​ເອງ​ຢ່າງ​ເປັນ​ທາງ​ການ​ຢູ່ຕາມ​ສູນບໍລິການ​ຂອງ​ບໍລິສັດ​ ຜູ້​ທີ່​ໃຫ້​ບໍລິ​ການດ້ານ​ໂທລະ​ຄົມມະນາ ຄົມ​ພາຍ​ໃນ 6 ​ເດືອນ​ໃຫ້​ສຳ​ເລັດ ສະ​ນັ້ນ ຖ້າ​ບຸກຄົນ ຫລື ນິຕິບຸກຄົນ​ໃດ​ຫາກ​ບໍ່​ໄປ​ຂຶ້ນ​ທະບຽນ​ເລກ​ໝາຍ​ຂອງ​ຕົນ​ຖື​ວ່າ​ເບີ​ດັ່ງກ່າວ​ຈະ​ບໍ່​ສາມາດ​ໃຊ້​ໄດ້​ທັນທີ. ຂະນະ​ທີ່ ປະຊາຊົນ​ສ່ວນ​​ໃຫຍ່​​ໃຫ້​ທັດສະນະ​ວ່າ: ການ​ຂຶ້ນ​ທະບຽນ​ເບີ​​ໂທລະສັບ​ມື​ຖື​ແບບ​ຕື່ມ​ເງິນ​ນັ້ນ​ແມ່ນ​ສິ່ງ​ທີ່​ດິ​ ແລະ ທັງຮັບປະກັນ​ຄວາມ​ໝັ້ນຄົງ​ຂອງ​ຊາດ ​ໄດ້​ອີກ​ດ້ວຍ ​ແຕ່ຂັ້ນ​ຕອນການ​ຂຶ້ນ​ຖະບຽນນັ້ນ ​ເຂົາ​ເຈົ້າ​ຢາກ​ຂໍ​ໃຫ້​ກະຊວງ ​ໄປສະນີ ​​ໂທລະ​ຄົມ ​ແລະ ການ​ສື່ສານ​ຄວນ​​​ເປີດ​ໂອກາດ ​ແລະ ​ໃຫ້​ທາງ​ເລືອ​ກ​ໃນ ​ຫລາ​ຍ​ແງ່​ມູມ​ເພື່ອ​ໃຫ້​ສິ່ງ​ອຳນວຍ​ຄວາມ​ສະ​ດວກ​ດ້ວຍ ​ວິທີ​ສຳລັບກຸ່ມ​ຜູ້​ໃຊ້​ໂທລະສັບ​ມື​ຖື​ໂດຍ​ສະ​ເພາະ​ການ​ຂຶ້ນ​ທະບຽນ​ນັ້ນ ​ອາດ​ຈະ​ສາມາດ​ອະນຸຍາດ​ໃຫ້​ອົງ ການ​ຈັດ​ຕັ້ງ​ຂອງ​ລັດ ຫລື ​ເອກະ​ຊົນ​ສາມາດ​ເກັບ​ກຳ​ເອົາ​ຕົວ​ເລກ​ຜູ້​ໃຊ້​ໂທລະສັບ​ມື​ຖື​ຕາມ​ໜ່ວຍ​ງານ​ຕ່າງໆທີ່​ຕົນ​ເຮັດ​ວຽກ​ຢູ່ ຫລັງ​ຈາກ​ນັ້ນ​ຈິ່ງ​ສົ່ງ​ບໍລິສັດຜູ້​ໃຫ້​ ບໍລິການ ພ້ອມ​ດຽວ​ກັນ​ນັ້ນ ປະຊາຊົນ​ຜູ້​ທີ່​ອາ​ຢູ່​ຕາມ​ບ້ານ ຫລື ທ້ອງ​ຖິ່ນ​ຕ່າງໆ​ນັ້ນ​ກໍ​ອາດ​ເປັນ​ອຳນາດ​ການ​ປົກຄອງ​ທ້ອງ​ຖິ່ນ ​ເປັນ​ຜູ້​ເກັບ​ກຳ​ຕົວ​ເລກ​ດັ່ງກ່າວ​​ເພື່ອ ​ສົ່ງ​ຕໍ່​ໃຫ້​ບໍລິສັດ ຊຶ່ງ​ບັນຫາ​ດັ່ງກ່າວ​ນັ້ນ ​ເຂົາ​ເຈົ້າ​ຄິດ​ວ່າ​ມັນ​ຈະ​ສະດວກ​ສະບາຍ​ເພີ່ມ​ຂຶ້ນ​ຕື່ມ​ອີກ​ລະດັບ​ໜຶ່ງ ​ແລະ ທັງ​ຫລຸດຜ່ອນ​ຄວາມ​ສັບສົນ ຫລື ການ​ແອ​ອັດ ຕາ​ມຈຸດ​ຕ່າງໆ​ໄດ້​ຢ່າງ​ມີ​ປະສິດທິ​ຜົນ.

ບໍລິສັດ​ລາວ​ໂທລະ​ຄົມ​ໄດ້​ເປີດ​ອາທິດ​ນີ້​ວ່າ: ຜູ້​ທີ່​ໃຊ້​ໂທລະສັບ​ມື​ຖື​ແບບ​ຕື່ມ​ເງິນ​ສາມາດ​ໄປ​ລົງທະບຽນ​ຕາມ​ຈຸດ​ບໍລິການ​ຕ່າງໆ​ ທີ່​ໃກ້​ບ້ານ​ຂອງ​ຕົນ​ໄດ້​ຕາມ​ເວລາ ​ລັດຖະການ ​ແຕ່​ກ່ອນ​ໄປ​ແຈ້ງ​ນັ້ນ​ບໍ່​ຄວນ​ລື່ມ​ບັດປະ​ຈຳ​ຕົວ/​ໃບ​ຢັ້ງຢືນ​ທີ່ຢູ່ ​ແລະ ສຳ​ມະ​ໂນ​ຄົວ ຕ້ອງ​ຖື​ຕິດ​ໂຕ​ໄປ​ພ້ອມ ສ່ວນ​ຄົນ​ຕ່າງປະ​ເທດ​ສາມາດ​​ນຳ​ໃຊ້​ ປັດ​ສະປອດ ( passport) ກໍ​ໄດ້.

ແນວ​ໃດ​ກໍ​ດີ ​ສປປ ລາວ​ ໄດ້​ລາຍ​ງານ​ວ່າ​ມີ​ປະຊາກອນ​ປະມານ 6 ລ້ານ​ຄົນ​ ທົ່ວ​ປະ​ເທດ​ໄດ້​ໂທລະສັບ​ເພື່ອ​ຕິດ​ຕໍ່​ພົວ ແລະ ສື່ສານ​ກັບ​ຄອບຄົວ, ​ໝູ່​ເພື່ອນ ​ແລະ ຂົງ​ເຂດ​ທຸລະ​ກິດ​ຕ່າງໆ​ລວມທັງ​ພາຍ​ໃນ ​ແລະ ຕ່າງປະ​ເທດ ຊຶ່ງ​ຖື​ວ່າ ການ​ໃຊ້​ໂທລະສັບ​ແມ່ນ​ບັນຫາ​ຊີວິດ​ປະ​ຈຳ​ວັນ​ທີ່​ຈຳ​ເປັນ.

ນັກວິຊາການ​ດ້ານ​​ໂທລະ​ຄົມມະ​ນາ​ຄົມ​ກ່າວ​ວ່າ: ການ​ປະກາດ​ໃຫ້​ຜູ້​ນຳ​ໃຊ້​ໂທລະສັບ​ມື​ຖື​ແບບ​ຕື່ມ​ເງິນ​ ຂຶ້ນ​ທະບຽນ​ນັ້ນ​ອາດ​ສົ່ງ​ຜົນ​ເຮັດ​ໃຫ້​ບາງ​ກຸ່ມ​ຄົນ​ຫລຸດ​ ຈຳນວນ​ການໃຊ້​ຊິ​ມທີ່​ມີ​ຫລາຍ​ເລກ​ໝາຍ​ໄວ້​ໃນ​ຄອບ​ຄອງ​ລົງ ​ເພາະ​ໄລຍະ​ຜ່ານ​ມາ ຄົນ​ສ່ວນ​ໃຫຍ່​ສາມາດຊື້​ຊິ​ມ​ໃນ​ລາຄາ​ທີ່​ຖືກ ​ແລະ ສະດວກ​ສະບາຍ​ທີ່​ສຸດ ​​ໂດຍ​ບໍ່​ຈຳ​ເປັນ​ຕ້ອງ​ຂຶ້ນ​ທະບຽນຈາກ​ລາຄາ 50.000 ກີບ ​ໃນ​ປີ 2008 ມາ ​ເປັນ 10.000 ກີບ ​ໃນ 2011 ຊຶ່ງ​ບັນຫາ​ດັ່ງກ່າວ​ເຮັດ​ໃຫ້​ຄົນ​ເລືອກ​ຊື້ ຫລື ​ເລືອກ​ໃຊ້​ ຕາມ​ໃຈ​ມັກ​ຂອງຕົນ. ສະ​ນັ້ນ ຄົນ​ບາງ​ກຸ່ມ​ຄິດ​ວ່າ ການ​​ໄດ້​ມີ​ໂອກາດ​ເລືອກ​ຊື້-​ເລືອກ​ໃຊ້​ຕາມ​ໃຈ​ມັກ​ນັ້ນ​ເປັນ​ການ​ເປີດ​ຊ່ອງ​ທາງ​​ເຮັດ​ໃຫ້​ເຂົາ​ເຈົ້າ​ສາມາດ​ຕິດ​ຕໍ່​ ພົວພັນກັບ​ກຸ່ມ​ຄົນ​ສ່ວນ​ໃຫຍ່​ໄດ້​ແບບ​ອິດສະຫລະ ​ແຕ່​​ໃນ​ທາງ​ກົງກັນຂ້າມ ​ການ​ເປີດ​ໂອກາດ​ໃຫ້​ຄົນ​ມີ​ສິດ​ຊື້​ຊິ​ມ​ໂທລະສັບ​ແບບ​ຕື່ມ​ເງິນ​ໂດຍ​ບໍ່​ຈຳ​ເປັນ​ຕ້ອງ​ຂຶ້ນ​ ທະບຽນ​ນັ້ນ​ໄດ້​ກໍໃຫ້​ເກີດ​ທາງ​ຜົນ​ດີ ​ແລະ ບວກ​ໄປ​ພ້ອມໆ​ກັນ ຊຶ່ງ​ນັກວິຊາ ການ​ດ້ານ​ຄວາມ​ໝັ້ນຄົງ​ຂອງ​ຊາດ​ໄດ້​ໃຫ້​ທັດສະນະ​ວ່າ: ​ການ​ເປີດ​ໂອກາດ​ໃຫ້​ຄົນ​ມີ​ ສິດ​ຊື້​ຊິ​ມ​ໂທລະ ສັບ​ແບບ​ຕື່ມ​ເງິນ​ໂດຍ​ບໍ່​ຈຳ​ເປັນ​ຕ້ອງ​ຂຶ້ນ​ທະບຽນນັ້ນອາດ​ມີ​ຄວາມ​ສ່ຽງ​ຕໍ່​ຄວາມ​ໝັ້ນຄົງ​ຂອງ​ຊາດ​ ​ເນື່ອງ​ຈາກ​ວ່າ​ມີ​ຫລາຍ​ກຸ່ມ​ຄົນ​ຢູ່​ຮ່ວມ​ກັນ​ໃນ​ ສັງຄົມ​ທີ່​ໃຊ້​ໂທລະສັບ​ມື​ຖື​ແບບ​ຕື່ມ​ເງິນ​ຕິດ​ຕໍ່​ພົວພັນ​​ໃນ​ຫລາຍ​ຮູບ​ແບບ ຊຶ່ງ​ເຮົາ​ບໍ່​ສາມາດ​ລະບຸ​ຊື່​ໄດ້​ວ່າ​ເບີ​ຂອງ​ກຸ່ມ​ຄົນ​ໃດ ນີ້​ໝາຍຄວາມ​ວ່າ​ຜູ້​ໃດ​ຕ້ອງການ​ຢາກ​ ໄດ້​ຊິ​ມທີ່​​​ໃໝ່​ສາມາດ​ເຂົ້າ​ໄປ​ຊື້ ​ແລະ ​ໃຊ້​ໄດ້​ທັນທີ ​ເມື່ອ​ບໍ່ຢາກໃຊ້ຊິ​ມ​ເກົ່າ​ແລ້ວ​ກໍສາມາດ​ຖິ້ມ​​ໄດ້​ທັນທີ​ໂດຍ​ບໍ່​ມີ​ຄວາມ​ຮູ້ສຶກ​​ເສຍດາຍ ​ແລະ ບໍ່​ມີ​ໃຜ​ຮູ້​ອີກ​ວ່າ​​ເບີ​ນີ້​ ເປັນ​ຂອງ​ໃຜ.