ພະພຸດທະຮູບເກືອບຮ້ອຍ ຖືກລັກ ຢູ່ວັດໃນແຂວງຫຼວງພະບາງ

(ຂປລ):ໂຄງການຝຶກອົບຮົມເຕັກນິກສິລະປະການປະຕິສັງຂອນພະພຸດທະຮູບເກົ່າ ຮ່ວມມືກັບກົມວິຈິດສິນ ກະຊວງ​ຖະ​ແຫລ​ງຂ່າວ ວັດທະນະທຳ ​ແລະ ທ່ອງ​ ທ່ຽວ, ແລະ ມະຫາວິທະຍາໄລມິໂນບຸ ແຂວງຢະມານະຊິ ປະເທດຍີ່ປຸ່ນ ໄດ້ສະຫລຸບ ແລະ ເປີດເຜີຍຫວ່າງບໍ່ດົນມານີ້ວ່າ: ໜ່ວຍງານວິຊາການຂອງ ໂຄງການຝຶກອົບ ຮົມເຕັກນິກສິລະປະການປະຕິສັງ ຂອນພະພຸດທະຮູບເກົ່າ ໄດ້ລົງກວດກາ-ສຳຫລວດ ແລະ ເກັບກຳຂໍ້ມູນ ຄືນພະພຸດທະຮູບທີ່ໄດ້ຂຶ້ນທະ ບຽນແລ້ວ ຈຳນວນ 1.300 ອົງ ນັບແຕ່ປີ 2007 ໃນຈຳນວນ 35 ວັດສຳຄັນໃນແຂວງຫລວງພະບາງນັ້ນເຫັນວ່າ ມີພະພຸດທະຮູບຈຳນວນ 89 ອົງຖືກລັກ ແລະ ເສຍຫາຍໂດຍບໍ່ຮູ້ເຫດຜົນ, ຂະນະນີ້ ກົມວິຈິດສິນ ໄດ້ຮ່ວມມືຢ່າງ​ໃກ້ຊິດກັບອຳນາດການປົກຄອງທ້ອງຖິ່ນ ເພື່ອຕິດຕາມ ແລະ ກູ້ຄືນພະພຸດທະ​ຮູບ​ນັ້ນຄືນມາ.

ກົມວິຈິດສິນ ຍັງລາຍງານວ່າ: ພາຍຫລັງໜ່ວຍງານກ່ຽວຂ້ອງລົງພື້ນກວດກາ-ສຳຫລວດພົບເຫັນວ່າ: ພະພຸດທະຮູບສ່ວນໃຫຍ່ທີ່ຖືກລັກ ແລະ ເສຍນັ້ນ ​ແມ່ນ ​ຢູ່ວັດຊຽງທອງ, ພັນຫລວງ, ຊຽງແມນ ແລະ ວັດຈຳນວນໜຶ່ງ, ພະພຸດທະຮູບທີ່ຖືກລັກ ແລະ ເສຍນັ້ນສ່ວນ​ໃຫຍ່ ແມ່ນພະພຸດທະຮູບໄມ້ ແລະ ທອງສຳລິດ.