ບ້າກາມທຳສຳເລົາເດັກ ອາຍຸ4 ປີ
ນາງ ສີສຸພັນ ຢູ່ບ້ານດົງໂດກ ໄດ້ເຂົ້າແຈ້ງຄວາມຕໍ່ເຈົ້າໜ້າທີ່ ປກສ ເມືອງໄຊທານີ ນະຄອນຫຼວງວຽງຈັນ ເພື່ອດຳເນີນຄະດີກັບທ້າວ ຄອນສະຫວັນ ອາຍຸ 23 ປີ ບ້ານດຽວກັນ ຖານຂົ່ມຂືນທຳສຳເລົາເດັກ ລູກສາວ 4 ປີຂອງຕົນ ພ້ອມທັງຮຽກຮ້ອງຄ່າປົວແປງຈິດໃຈຈາກຜູ້ກ່ຽວ ເປັນເງິນ 20 ລ້ານກີບ.
ວັນທີ 25 ທັນວາ 2011 ເຈົ້າໜ້າທີ່ ປກສ ເມືອງໄຊທານີ ໄດ້ນຳຕົວທ້າວ ຄອນສະຫວັນ ຕາມການແຈ້ງຄວາມຂອງຜູ້ປົກຄອງຂອງຜູ້ຖືກເສຍຫາຍ ຜູ້ກ່ຽວໃຫ້ການວ່າ: ໃນມື້ເກີດເຫດ ເວລາປະມານ 16:00 ໂມງ ຕົນເອງໄດ້ອອກໄປກິນເບຍນຳໝູ່ຢູ່ບ້ານຕານມີໄຊ ພໍຮອດເວລາປະມານ 17:00 ໂມງ ກັບຄືນມາເຮືອນຂອງຕົນເອງ ໃນເວລານັ້ນ ໄດ້ພົບເຫັນນາງ ນ້ອຍ (ນາມສົມມຸດ) ອາຍຸ 4 ປີ ນັ່ງຫຼິ້ນຢູ່ໜ້າເຮືອນຂອງຜູ້ກ່ຽວ ຕົນເອງເກີດມີແນວຄິດຢາກຮ່ວມເພດ ຈຶ່ງຍ່າງເຂົ້າໄປອູ້ມນາງ ນ້ອຍ ເຂົ້າໄປໃນປ່າຫຼັງເຮືອນຮ້າງ ບໍລິເວນໃກ້ເຮືອນຂອງຜູ້ເສຍຫາຍ ແຕ່ໃນຂະນະທີ່ຕົນເອງພະຍາຍາມທຳສຳເລົາເດັກຢູ່ນັ້ນ ກໍມີຄົນຜ່ານມາພົບເຫັນ ແລະ ໄດ້ເຂົ້າຊ່ວຍເດັກນ້ອຍ ແລ້ວຈັບກຸມຕົນເອງ ສົ່ງໃຫ້ອຳນາດການປົກຄອງບ້ານດົງໂດກ ຫຼັງຈາກນັ້ນ ກໍສົ່ງໃຫ້ເຈົ້າໜ້າທີ່ກອງບັນຊາການ ປກສ ເມືອງໄຊທານີ ດຳເນີນການສອບສວນ ເຈົ້າໜ້າທີ່ ປກສ ເມືອງດັ່ງກ່າວ ຍັງໃຫ້ຮູ້ອີກວ່າ: ໃນໄລຍະຜ່ານມາ ຜູ້ຕ້ອງຫາຍັງເຄີຍຖືກອຳນາດການປົກຄອງບ້ານດົງໂດກ ນຳຕົວມາສຶກສາອົບຮົມຫຼາຍຄັ້ງ ເນື່ອງຈາກວ່າຜູ້ກ່ຽວມີພຶດຕິກຳເປັນນັກເລງອັນຕະພານ ແລະ ຜ່ານມາຜູ້ຕ້ອງຫາລາຍນີ້ ເມົາແລ້ວກໍ່ເຫດອາລະວາດຕີກັນມາແລ້ວຫຼາຍຄັ້ງ ພ້ອມກັນນີ້ ອຳນາດການປົກຄອງບ້ານ ໄດ້ສົມທົບກັບຕຳຫຼວດກຸ່ມດົງໂດກ ຂຶ້ນເປົ້າໝາຍຕິດຕາມຜູ້ກ່ຽວໃນເປົ້າໝາຍນັກເລງອັນຕະພານ.
ເຈົ້າໜ້າທີ່ ປກສ ເມືອງໄຊທານີ ເຫັນວ່າ ການກະທຳຂອງທ້າວ ຄອນສະຫວັນ ແມ່ນເປັນການກະທຳຜິດທາງອາຍາ ໃນມາດຕາ 128 ວັກທີ 3 ປະໂຫຍກ 2 ສະຖານຂົ່ມຂືນທຳສຳເລົາເດັກຕ່ຳກ່ວາ 15 ປີ.
